মুখ্য পৃষ্ঠা
06/04/25
14:29
"উদাস বাতৰি"
ওঁঠ চেলেকি পাৰ হৈ যোৱা
এটা নীৰস হাঁহিৰে স্বাগতম তোমাক
পুৱাৰ সতেজ বতাহ এজাকে
লৈ আহে তোমাৰ বুকুত খামুচি
অনিয়মৰ ফুলজাৰি ,
অথবা মৃত্যুৰ কিৰিলি |
তেজৰ চেঁকুৰা বোৰ চিকুটি চিকুটি
সৌৱা ৰাজপথত এজাক শিশু |
খাদ্যৰ অম্বেষণত উৰে সিহঁতৰ ওপৰেৰে
এটা ক'লা কাউৰিৰ দল |
তোমাৰ চকুত সেয়া অমংগল ,
দেশৰ বাবে মংগল |
উৱঁলি যোৱা কাপোৰ সাজেৰে
বুভুক্ষা দাড়ি লৈ এটা পাগল ,
দুহাতত চানাৱালাৰ এখন ফটা কাগজ লৈ
সি পঢ়িছে প্ৰেমৰ অলেখ কবিতা |
সি প্ৰেমিক চৰাই ,
উৰি উৰি পাৰ হৈ যাব বিচাৰে
হিমালয়ৰ সুউচ্ছ এভাৰেষ্ট শৃংগ |
তোমাৰ বাবে ,সমাজৰ বাবে
সি সঁচাকৈ পাগল |
তুমিটো নাজানা ,
তাৰো যে থাকিব পাৰে জীয়াই থকাৰ নিচা |
© ৰাজু কলিতা
10/11/14
